‏ Job 12

Hotuba Ya Nne Ya Ayubu

Ayubu Anajibu: Mimi Ni Mtu Wa Kuchekwa

1Ndipo Ayubu akajibu:

2 ^a“Bila shaka ninyi ndio watu,
nayo hekima itakoma mtakapokufa!
3 ^bLakini mimi ninao ufahamu kama ninyi;
mimi si duni kwenu.
Ni nani asiyejua mambo haya yote?

4 ^c“Nimekuwa mtu wa kuchekwa na rafiki zangu,
ingawa nilimwita Mungu naye akanijibu:
mimi ni mtu wa kuchekwa tu,
ingawa ni mwadilifu na nisiye na hatia!
5 ^dWanadamu wakiwa katika utulivu huwa na dharau kwa wale wenye msiba
kana kwamba ndiyo haki ya wale ambao miguu yao inateleza.
6 ^eHema za wanyangʼanyi hazisumbuliwi,
wale wanaomghadhibisha Mungu wako salama:
wale wamchukuao mungu wao mikononi mwao.

7 ^f“Lakini ulizeni wanyama, nao watawafundisha,
au ndege wa angani, nao watawaambia;
8au zungumzeni na dunia, nayo itawafundisha,
au acheni samaki wa baharini wawape taarifa.
9 ^gNi nani miongoni mwa hawa wote asiyejua
kwamba mkono wa Bwana ndio uliofanya hili?
10 ^hMkononi mwake kuna uhai wa kila kiumbe,
na pumzi ya wanadamu wote.
11 ⁱJe, sikio haliyajaribu maneno
kama vile ulimi uonjavyo chakula?
12 ^jJe, hekima haipatikani katikati ya wazee?
Je, maisha marefu hayaleti ufahamu?

13 ^k“Hekima na nguvu ni vya Mungu;
shauri na ufahamu ni vyake yeye.
14 ^lKile anachokibomoa hakiwezi kujengeka tena;
mtu aliyefungiwa naye hawezi kufunguliwa.
15 ^mAkizuia maji, huwa pana ukame;
akiyaachia maji, huharibu nchi.
16 ⁿKwake kuna nguvu na ushindi;
adanganywaye na adanganyaye, wote wawili ni wake.
17 ^oYeye huwaondoa washauri wakiwa wametekwa nyara,
naye huwapumbaza wanaotoa maamuzi.
18 ^pHuondoa pingu zilizofungwa na wafalme,
na kuwafunga mishipi ya kiunoni.
19 ^qHuwaondoa makuhani wakiwa wametekwa nyara,
na kuwaangusha waliojiimarisha muda mrefu.
20 ^rHunyamazisha midomo ya washauri wanaoaminika,
na kuondoa busara ya wazee.
21 ^sHuwamwagia dharau wanaoheshimika,
na kuwavua silaha wenye nguvu.
22 ^tHufunua mambo ya ndani ya gizani,
na kuyaleta nuruni yale yaliyositirika sana.
23 ^uHuyafanya mataifa yatukuke na kuyaangamiza;
hufanya mataifa kuwa makubwa, naye huyatawanya.
24Huwaondolea viongozi wa nchi akili zao;
huwapeleka watangetange nyikani pasipo na njia.
25 ^vHupapasa gizani pasipokuwa na mwanga;
huwafanya wapepesuke kama walevi.