‏ Job 33

Elihu Anamkemea Ayubu

1 ^a“Lakini Ayubu, sasa, sikiliza maneno yangu;
zingatia kila kitu nitakachosema.
2Karibu nitafungua kinywa changu;
maneno yangu yapo katika ncha ya ulimi wangu.
3 ^bManeno yangu yanatoka katika moyo mnyofu;
midomo yangu hunena kwa uaminifu yale niyajuayo.
4 ^cRoho wa Mungu ameniumba;
pumzi ya Mwenyezi hunipa uhai.
5 ^dUnijibu basi, kama unaweza;
jiandae kunikabili mimi.
6 ^eMimi ni kama wewe mbele za Mungu;
mimi pia nimetolewa kwenye udongo.
7 ^fHuna sababu ya kuniogopa,
wala mkono wangu haupaswi kukulemea.

8“Lakini umesema nikiwa ninakusikia,
nami nilisikia maneno yenyewe:
9 ^g‘Mimi ni safi na sina dhambi;
mimi ni safi na sina hatia.
10 ^hLakini bado Mungu amepata dosari kwangu,
naye ananiona kama adui yake.
11 ⁱAnanifunga miguu kwa pingu,
tena anaziangalia njia zangu zote kwa karibu.’

12 ^j“Lakini mimi ninakuambia, katika jambo hili wewe una makosa,
kwa maana Mungu ni mkuu kuliko mwanadamu.
13 ^kKwa nini unamlalamikia
kwamba yeye hamjibu mwanadamu?
14 ^lKwa kuwa Mungu husema, wakati huu kwa njia moja,
au wakati mwingine kwa njia nyingine,
ingawa mwanadamu anaweza asielewe.
15 ^mMungu husema na mwanadamu katika ndoto,
katika maono ya usiku,
wakati usingizi mzito uwaangukiapo
wanadamu wasinziapo vitandani mwao,
16 ⁿanaweza akasemea masikioni mwao,
na kuwatia hofu kwa maonyo,
17 ^oili kumgeuza mtu kutoka kwenye kutenda mabaya
na kumwepusha na kiburi,
18 ^pkuiokoa nafsi yake na shimo,
uhai wake usiangamizwe kwa upanga.
19 ^qMtu anaweza kutiwa adabu kwa maumivu kitandani mwake,
kwa dhiki za mfululizo katika mifupa yake,
20 ^rkiasi kwamba maisha yake yenyewe yanakataa chakula
nayo nafsi yake ikakichukia kabisa hata chakula kizuri.
21 ^sNyama ya mwili wake huisha kwa kukonda,
nayo mifupa yake ambayo mwanzoni ilikuwa imefichika,
sasa inatokeza nje.
22 ^tNafsi yake inakaribia kaburi,
nao uhai wake karibu na wajumbe wa kifo.

23 ^u“Kama bado kuna malaika upande wake
kama mtetezi, mmoja miongoni mwa elfu,
wa kumwambia mwanadamu lililo jema kwake,
24 ^vkumwonea huruma na kusema,
‘Mwokoe asije akatumbukia shimoni;
nimepata ukombozi kwa ajili yake’:
25 ^wndipo nyama ya mwili wake hufanywa mpya kama ya mtoto;
hurudishwa upya kama siku za ujana wake.
26 ^xHumwomba Mungu, akapata kibali kwake,
huuona uso wa Mungu na kushangilia kwa furaha;
Mungu humrudisha katika hali yake ya uadilifu.
27 ^yNdipo huja mbele za watu na kusema,
‘Nilitenda dhambi na kupotosha kilichokuwa haki,
lakini sikuadhibiwa kama nilivyostahili.
28 ^zAlinikomboa nafsi yangu nisitumbukie shimoni,
nami nitaishi ili kuufurahia mwanga.’

29 ^aa“Mungu hufanya haya yote kwa mwanadamu;
mara mbili hata mara tatu,
30 ^abili aigeuze nafsi yake toka shimoni,
ili nuru ya uzima imwangazie.

31 ^ac“Ayubu, zingatia, nisikilize mimi;
nyamaza, nami nitanena.
32 ^adKama unalo lolote la kusema, unijibu;
sema, kwa maana ninataka uonekane huna hatia.
33 ^aeLakini kama huna la kusema, basi nisikilize mimi;
nyamaza, nami nitakufundisha hekima.”