‏ Psalms 103

Upendo Wa Mungu

Zaburi ya Daudi.

1 ^aEe nafsi yangu, umhimidi Bwana.
Vyote vilivyomo ndani yangu
vilihimidi jina lake takatifu.
2 ^bEe nafsi yangu, umhimidi Bwana,
wala usisahau wema wake wote,
3 ^cakusamehe dhambi zako zote,
akuponya magonjwa yako yote,
4 ^daukomboa uhai wako na kaburi,
akuvika taji ya upendo na huruma,
5 ^eatosheleza mahitaji yako kwa vitu vyema,
ili ujana wako uhuishwe kama wa tai.

6 ^f Bwana hutenda haki,
naye huwapa hukumu ya haki wote wanaoonewa.

7 ^gAlijulisha Mose njia zake,
na wana wa Israeli matendo yake.
8 ^h Bwana ni mwingi wa huruma na mwenye neema;
si mwepesi wa hasira, bali amejaa upendo.
9 ⁱYeye hatalaumu siku zote,
wala haweki hasira yake milele,
10 ^jyeye hatutendei kulingana na dhambi zetu
wala hatupatilizi kwa kadiri ya maovu yetu.
11 ^kKama vile mbingu zilivyo juu ya dunia sana,
ndivyo wema wake ulivyo mwingi kwa wanaomcha;
12 ^lkama mashariki ilivyo mbali na magharibi,
ndivyo Mungu alivyoziweka dhambi zetu mbali nasi.
13 ^mKama baba alivyo na huruma kwa watoto wake,
ndivyo Bwana anavyowahurumia wale wanaomcha;
14 ⁿkwa kuwa anajua tulivyoumbwa,
anakumbuka kwamba sisi tu mavumbi.
15 ^oKuhusu mwanadamu, siku zake ni kama majani,
anachanua kama ua la shambani;
16 ^pupepo huvuma juu yake nalo hutoweka,
mahali pake hapalikumbuki tena.
17 ^qLakini kutoka milele hata milele
upendo wa Bwana uko kwa wale wamchao,
nayo haki yake kwa watoto wa watoto wao:
18 ^rkwa wale walishikao agano lake
na kukumbuka kuyatii mausia yake.

19 Bwana ameweka imara kiti chake cha enzi mbinguni,
ufalme wake unatawala juu ya vyote.
20 ^sMhimidini Bwana, enyi malaika zake,
ninyi mlio mashujaa mnaozitii amri zake,
ninyi mnaotii neno lake.
21 ^tMhimidini Bwana, ninyi jeshi lake lote la mbinguni,
ninyi watumishi wake mnaofanya mapenzi yake.
22 ^uMhimidini Bwana, kazi zake zote
kila mahali katika milki yake.

Ee nafsi yangu, umhimidi Bwana.