‏ Psalms 105

Uaminifu Wa Mungu Kwa Israeli

(1 Nyakati 16:8-22)

1 ^aMshukuruni Bwana, liitieni jina lake,
wajulisheni mataifa yale aliyoyatenda.
2 ^bMwimbieni yeye, mwimbieni yeye sifa,
waambieni matendo yake yote ya ajabu.
3 ^cLishangilieni jina lake takatifu,
mioyo ya wale wamtafutao Bwana na ifurahi.
4 ^dMtafuteni Bwana na nguvu zake,
utafuteni uso wake siku zote.

5 ^eKumbuka matendo ya ajabu aliyoyafanya,
miujiza yake na hukumu alizozitamka,
6 ^fenyi wazao wa Abrahamu mtumishi wake,
enyi wana wa Yakobo, wateule wake.
7 ^gYeye ndiye Bwana Mungu wetu,
hukumu zake zimo duniani pote.

8 ^hHulikumbuka agano lake milele,
neno ambalo aliamuru, kwa vizazi elfu,
9 ⁱagano alilolifanya na Abrahamu,
kiapo alichomwapia Isaki.
10 ^jAlilithibitisha kwa Yakobo kuwa amri,
kwa Israeli liwe agano la milele:
11 ^k“Nitakupa wewe nchi ya Kanaani
kuwa sehemu utakayoirithi.”

12 ^lWalipokuwa wachache kwa idadi,
wachache sana na wageni ndani yake,
13 ^mwalitangatanga kutoka taifa moja hadi jingine,
kutoka ufalme mmoja hadi mwingine.
14 ⁿHakuruhusu mtu yeyote awaonee;
kwa ajili yao aliwakemea wafalme, akisema:
15 ^o“Msiwaguse niliowatia mafuta;
msiwadhuru manabii wangu.”

16 ^pAkaiita njaa juu ya nchi
na kuharibu chakula chao chote,
17 ^qnaye akatuma mtu mbele yao,
Yosefu, aliyeuzwa kama mtumwa.
18 ^rWalichubua miguu yake kwa minyororo,
shingo yake ilifungwa kwa chuma,
19 ^shadi yale aliyotangulia kusema yalipotimia,
hadi neno la Bwana lilipomthibitisha.
20 ^tMfalme alituma watu wakamfungua,
mtawala wa watu alimwachia huru.
21Alimfanya mkuu wa nyumba yake,
mtawala juu ya vyote alivyokuwa navyo,
22 ^ukuwaelekeza wakuu wa mfalme apendavyo
na kuwafundisha wazee wake hekima.

23 ^vKisha Israeli akaingia Misri,
Yakobo akaishi kama mgeni katika nchi ya Hamu.
24 ^w Bwana aliwafanya watu wake kuzaana sana,
akawafanya kuwa wengi sana kuliko adui zao,
25 ^xndiye aliigeuza mioyo yao iwachukie watu wake,
wakatenda hila dhidi ya watumishi wake.
26 ^yAkamtuma Mose mtumishi wake,
pamoja na Aroni, aliyemchagua.
27 ^zWalifanya ishara zake za ajabu miongoni mwao,
miujiza yake katika nchi ya Hamu.
28 ^aaAlituma giza na nchi ikajaa giza,
kwani si walikuwa wameyaasi maneno yake?
29 ^abAligeuza maji yao kuwa damu,
ikasababisha samaki wao kufa.
30 ^acNchi yao ilijaa vyura tele, ambao waliingia
hadi kwenye vyumba vya kulala vya watawala wao.
31 ^adAlisema, yakaja makundi ya mainzi,
na viroboto katika nchi yao yote.
32 ^aeAlibadilisha mvua yao ikawa mvua ya mawe,
yenye umeme wa radi nchini yao yote,
33 ^afakaharibu mizabibu yao na miti ya tini,
na akaangamiza miti ya nchi yao.
34 ^agAlisema, nzige wakaja,
tunutu wasio na idadi,
35wakala kila jani katika nchi yao,
wakala mazao ya ardhi yao.
36 ^ahKisha akawaua wazaliwa wote wa kwanza katika nchi yao,
matunda ya kwanza ya ujana wao wote.

37 ^aiAkawatoa Israeli katika nchi
wakiwa na fedha na dhahabu nyingi,
wala hakuna hata mmoja
kutoka kabila zao aliyejikwaa.
38 ^ajMisri ilifurahi walipoondoka,
kwa sababu hofu ya Israeli ilikuwa imewaangukia.
39 ^akAlitandaza wingu kama kifuniko,
na moto kuwamulikia usiku.
40 ^alWaliomba, naye akawaletea kware,
akawashibisha kwa mkate wa mbinguni.
41 ^amAlipasua mwamba, maji yakabubujika,
yakatiririka jangwani kama mto.

42 ^anKwa maana alikumbuka ahadi yake takatifu,
aliyompa Abrahamu mtumishi wake.
43 ^aoAliwatoa watu wake kwa furaha,
wateule wake kwa kelele za shangwe,
44 ^apakawapa nchi za mataifa, wakawa warithi
wa mali wengine walikuwa wameitaabikia:
45 ^aqalifanya haya ili wayashike mausia yake
na kuzitii sheria zake.

Msifuni Bwana. ▼

▼Msifuni Bwana kwa Kiebrania ni Hallelu Yah.