‏ Psalms 106

Wema Wa Bwana Kwa Watu Wake

1 ^aMsifuni Bwana.

Mshukuruni Bwana, kwa kuwa ni mwema;
upendo wake wadumu milele.
2 ^bNi nani awezaye kusimulia matendo makuu ya Bwana
au kutangaza kikamilifu sifa zake?
3 ^cHeri wale wanaodumisha haki,
ambao daima wanafanya yaliyo mema.
4 ^dEe Bwana, unikumbuke unapowatendea mema watu wako,
uwe msaada wangu unapowaokoa,
5 ^eili niweze kufurahia mafanikio ya wateule wako,
niweze kushiriki katika furaha ya taifa lako,
na kuungana na urithi wako katika kukusifu.

6 ^fTumetenda dhambi, kama vile baba zetu walivyotenda,
tumekosa na tumetenda uovu.
7 ^gWakati baba zetu walipokuwa Misri,
hawakuzingatia maajabu yako,
wala hawakukumbuka wingi wa fadhili zako,
bali waliasi kando ya bahari, Bahari ya Shamu.
8 ^hHata hivyo aliwaokoa kwa ajili ya jina lake,
ili apate kudhihirisha uweza wake mkuu.
9 ⁱAlikemea Bahari ya Shamu, nayo ikakauka,
akawaongoza katika vilindi vyake kama vile jangwani.
10 ^jAliwaokoa mikononi mwa adui;
kutoka mikononi mwa adui aliwakomboa.
11 ^kMaji yaliwafunika adui zao,
hakunusurika hata mmoja.
12 ^lNdipo walipoamini ahadi zake,
nao wakaimba sifa zake.

13 ^mLakini mara walisahau aliyowatendea,
wala hawakungojea shauri lake.
14 ⁿJangwani walitawaliwa na tamaa zao,
walimjaribu Mungu nyikani.
15 ^oKwa hiyo aliwapa kile walichoomba,
lakini akatuma juu yao ugonjwa wa kudhoofisha.

16 ^pKambini walimwonea wivu Mose,
na pia Aroni aliyekuwa amewekwa wakfu kwa Bwana.
17 ^qArdhi ilifunguka ikawameza Dathani,
ikawazika Abiramu na kundi lake.
18 ^rMoto uliwaka katikati ya wafuasi wao,
mwali wa moto uliwateketeza waovu.

19 ^sHuko Horebu walitengeneza ndama,
na kuabudu sanamu ya kusubu kwa chuma.
20 ^tWaliubadilisha Utukufu wao
kwa sanamu ya fahali, ambaye hula majani.
21 ^uWalimsahau Mungu aliyewaokoa,
aliyekuwa ametenda mambo makuu huko Misri,
22 ^vmiujiza katika nchi ya Hamu
na mambo ya kutisha huko Bahari ya Shamu.
23 ^wKwa hiyo alisema kwamba angewaangamiza:
kama Mose mteule wake,
asingesimama kati yao na Mungu
kuizuia ghadhabu yake kuwaangamiza.

24 ^xKisha waliidharau ile nchi nzuri,
hawakuiamini ahadi yake.
25 ^yWalinungʼunika ndani ya mahema yao,
wala hawakumtii Bwana.
26 ^zKwa hiyo akaapa kwa mkono ulioinuliwa
kwamba atawafanya waanguke jangwani,
27 ^aakuwatawanya wazao wao waanguke miongoni mwa mataifa,
na kuwatawanya katika nchi zote.

28 ^abWalijifunga nira na Baali wa Peori,
wakala dhabihu zilizotolewa kwa miungu isiyo na uhai.
29 ^acWaliichochea hasira ya Bwana,
wakamkasirisha kwa matendo yao maovu,
nayo tauni ikazuka katikati yao.
30 ^adLakini Finehasi alisimama na kuingilia kati,
nayo tauni ikazuiliwa.
31 ^aeHili likahesabiwa kwake haki,
kwa vizazi visivyo na mwisho vijavyo.

32 ^afKwenye maji ya Meriba, walimkasirisha Bwana,
janga likampata Mose kwa sababu yao;
33 ^agkwa maana walimwasi Roho wa Mungu,
na maneno yasiyofaa yakatoka midomoni kwa Mose.

34 ^ahHawakuyaangamiza yale mataifa
kama Bwana alivyowaagiza,
35 ^aibali walijichanganya na mataifa
na wakazikubali desturi zao.
36 ^ajWaliabudu sanamu zao,
zikawa mtego kwao.
37 ^akWakawatoa wana wao
na binti zao dhabihu kwa mashetani.
38 ^alWalimwaga damu isiyo na hatia,
damu za wana wao na binti zao,
ambao waliwatoa dhabihu kwa sanamu za Kanaani,
nayo nchi ikanajisika kwa damu zao.
39 ^amWakajinajisi wenyewe kwa yale waliyotenda;
kwa matendo yao wenyewe wakajifanyia ukahaba.

40 ^anKwa hiyo Bwana akawakasirikia watu wake
na akauchukia sana urithi wake.
41 ^aoAkawakabidhi kwa mataifa
na adui zao wakawatawala.
42 ^apAdui zao wakawaonea
na kuwatia chini ya mamlaka yao.
43 ^aqMara nyingi aliwaokoa
lakini walikuwa wamezama kwenye uasi,
nao wakajiharibu katika dhambi zao.

44 ^arLakini akaangalia mateso yao
wakati aliposikia kilio chao;
45 ^askwa ajili yao akakumbuka agano lake,
na kutokana na upendo wake mkuu akapooza hasira yake.
46 ^atAkawafanya wahurumiwe
na wote waliowashikilia mateka.

47 ^auEe Bwana Mungu wetu, tuokoe.
Tukusanye tena kutoka kwa mataifa,
ili tuweze kulishukuru jina lako takatifu,
na kushangilia katika sifa zako.

48 ^avAtukuzwe Bwana, Mungu wa Israeli,
tangu milele na hata milele.
Watu wote na waseme, “Amen!”

Msifuni Bwana.