‏ Psalms 66

Kusifu Mungu Kwa Ajili Ya Wema Wake

Kwa mwimbishaji. Wimbo. Zaburi.

1 ^aMpigieni Mungu kelele za shangwe, dunia yote!
2 ^bImbeni utukufu wa jina lake;
mpeni sifa zake kwa utukufu!
3 ^cMwambieni Mungu, “Jinsi gani yalivyo ya kutisha matendo yako!
Uwezo wako ni mkuu mno kiasi kwamba
adui wananyenyekea mbele zako.
4 ^dDunia yote yakusujudia,
wanakuimbia wewe sifa,
wanaliimbia sifa jina lako.”

5 ^eNjooni mwone yale Mungu aliyoyatenda,
mambo ya kutisha aliyoyatenda
miongoni mwa wanadamu!
6 ^fAlifanya bahari kuwa nchi kavu,
wakapita kati ya maji kwa miguu,
njooni, tumshangilie.
7 ^gYeye hutawala kwa uwezo wake milele,
macho yake huangalia mataifa yote:
waasi wasithubutu kujiinua dhidi yake.

8 ^hEnyi mataifa, msifuni Mungu wetu,
sauti ya sifa yake isikike,
9 ⁱameyahifadhi maisha yetu
na kuizuia miguu yetu kuteleza.
10 ^jEe Mungu, wewe ulitujaribu,
ukatusafisha kama fedha.
11 ^kUmetuingiza kwenye nyavu
na umetubebesha mizigo mizito
migongoni mwetu.
12 ^lUliwaruhusu watu watukalie vichwani,
tulipita kwenye moto na kwenye maji,
lakini ulituleta kwenye nchi
iliyojaa utajiri tele.

13 ^mNitakuja hekaluni mwako na sadaka za kuteketezwa
na kukutimizia nadhiri zangu:
14nadhiri ambazo midomo yangu iliahidi
na nilizotamka kwa kinywa changu
nilipokuwa katika shida.
15 ⁿNitakutolea dhabihu za wanyama wanono
na sadaka za kondoo dume,
nitakutolea mafahali na mbuzi.

16 ^oNjooni msikilize ninyi nyote mnaomcha Mungu,
nami niwaambie aliyonitendea.
17Nilimlilia kwa kinywa changu,
sifa zake zilikuwa katika ulimi wangu.
18 ^pKama ningekuwa nimeyaficha maovu moyoni mwangu,
Bwana asingekuwa amenisikiliza;
19 ^qlakini hakika Mungu amenisikiliza
na amesikia sauti yangu katika maombi.
20 ^rSifa apewe Mungu,
ambaye hakulikataa ombi langu
wala kunizuilia upendo wake!