‏ Psalms 77

Matendo Makuu Ya Mungu Yanakumbukwa

Kwa mwimbishaji. Mtindo wa Yeduthuni. Zaburi ya Asafu.

1 ^aNilimlilia Mungu ili anisaidie,
nilimlilia Mungu ili anisikie.
2 ^bNilipokuwa katika taabu, nilimtafuta Bwana,
usiku nilinyoosha mikono bila kuchoka
na nafsi yangu ilikataa kufarijika.

3 ^cEe Mungu, nilikukumbuka wewe, nikalia kwa huzuni;
nikatafakari, roho yangu ikadhoofika.
4 ^dUlizuia macho yangu kufumba;
nilikuwa nasumbuka, nikashindwa kusema.
5 ^eNilitafakari juu ya siku zilizopita,
miaka mingi iliyopita,
6nilikumbuka nilivyoimba nyimbo usiku.
Moyo wangu ulitafakari
na roho yangu ikauliza:

7 ^f“Je, Bwana atakataa milele?
Je, hatatenda mema tena?
8 ^gJe, upendo wake usio na mwisho umetoweka milele?
Je, ahadi yake imekoma nyakati zote?
9 ^hJe, Mungu amesahau kuwa na huruma?
Je, katika hasira amezuia huruma yake?”

10 ⁱNdipo nikawaza, “Huu ndio udhaifu wangu:
lakini nitakumbuka
miaka ya mkono wa kuume
wa Aliye Juu Sana.”
11 ^jNitayakumbuka matendo ya Bwana;
naam, nitaikumbuka miujiza yako ya zamani.
12 ^kNitazitafakari kazi zako zote
na kuyawaza matendo yako makuu.

13 ^lEe Mungu, njia zako ni takatifu.
Ni mungu yupi aliye mkuu kama Mungu wetu?
14 ^mWewe ndiwe Mungu utendaye miujiza,
umeonyesha uwezo wako katikati ya mataifa.
15 ⁿKwa mkono wako wenye nguvu umewakomboa watu wako,
uzao wa Yakobo na Yosefu.

16 ^oMaji yalikuona, Ee Mungu,
maji yalikuona yakakimbia,
vilindi vilitetemeka.
17 ^pMawingu yalimwaga maji,
mbingu zikatoa ngurumo kwa radi,
mishale yako ikametameta huku na huko.
18 ^qNgurumo yako ilisikika katika upepo wa kisulisuli,
umeme wako wa radi ukaangaza dunia,
nchi ikatetemeka na kutikisika.
19 ^rNjia yako ilipita baharini,
mapito yako kwenye maji makuu,
ingawa nyayo zako hazikuonekana.

20 ^sUliongoza watu wako kama kundi
kwa mkono wa Mose na Aroni.