‏ Psalms 94

Mungu Mlipiza Kisasi Kwa Ajili Ya Wenye Haki

1 ^aEe Bwana, ulipizaye kisasi,
Ee Mungu ulipizaye kisasi, uangaze sasa.
2 ^bEe Mhukumu wa dunia, inuka,
uwalipize wenye kiburi kama wanavyostahili.
3 ^cHata lini, waovu, Ee Bwana,
hata lini waovu watashangilia?

4 ^dWanamimina maneno ya kiburi,
watenda mabaya wote wamejaa majivuno.
5 ^eEe Bwana, wanawaponda watu wako,
wanawaonea urithi wako.
6 ^fWanamchinja mjane na mgeni,
na kuwaua yatima.
7 ^gNao husema, “Bwana haoni,
Mungu wa Yakobo hafahamu.”

8 ^hSikizeni, enyi wajinga miongoni mwa watu;
enyi wapumbavu, lini mtakuwa na hekima?
9 ⁱJe, aliyeweka sikio asisikie?
Aliyeumba jicho asione?
10 ^jJe, anayeadhibisha mataifa asiadhibu?
Je, awafundishaye wanadamu asiwe na maarifa?
11 ^k Bwana anajua mawazo ya mwanadamu;
anajua kwamba ni ubatili.

12 ^lEe Bwana, heri mtu anayeadhibishwa na wewe,
mtu unayemfundisha kwa sheria yako,
13 ^munampa utulivu siku za shida,
mpaka shimo litakapokuwa limechimbwa
kwa ajili ya mwovu.
14 ⁿKwa kuwa Bwana hatawakataa watu wake,
hatauacha urithi wake.
15 ^oHukumu itasimamishwa tena kwenye haki,
wote walio na mioyo minyofu wataifuata.

16 ^pNi nani atakayeinuka dhidi ya mwovu kwa ajili yangu?
Ni nani atakayenikinga dhidi ya watenda maovu?
17 ^qKama Bwana asingelinisaidia upesi,
ningelikuwa ninaishi katika ukimya wa kifo.
18 ^rNiliposema, “Mguu wangu unateleza,”
Ee Bwana, upendo wako ulinishikilia.
19 ^sWakati wasiwasi ulipokuwa mwingi ndani yangu,
faraja yako ilinipa furaha nafsini mwangu.

20 ^tJe, kiti cha utawala wa udhalimu kitajiunga nawe,
ule utawala uletao taabu kutokana na sheria zake?
21 ^uHuungana kuwashambulia wenye haki,
kuwahukumu kufa wasio na hatia.
22 ^vLakini Bwana amekuwa ngome yangu,
na Mungu wangu amekuwa mwamba ninaoukimbilia.
23 ^wYeye atawalipa kwa ajili ya dhambi zao
na atawaangamiza kwa ajili ya maovu yao;
Bwana Mungu wetu atawaangamiza.