‏ Psalms 37:12-40

12 ^aWaovu hula njama dhidi ya wenye haki
na kuwasagia meno,
13 ^bbali Bwana huwacheka waovu,
kwa sababu anajua siku yao inakuja.

14 ^cWaovu huchomoa upanga
na kupinda upinde,
ili wawaangushe maskini na wahitaji,
kuwachinja wale ambao njia zao ni nyofu.
15 ^dLakini panga zao zitachoma mioyo yao wenyewe,
na pinde zao zitavunjwa.

16 ^eBora kidogo walicho nacho wenye haki
kuliko wingi wa mali wa waovu wengi;
17 ^fkwa maana nguvu za waovu zitavunjwa,
lakini Bwana humtegemeza mwenye haki.

18 ^g Bwana anazifahamu siku za wanyofu,
na urithi wao utadumu milele.
19 ^hSiku za maafa hawatanyauka,
siku za njaa watafurahia wingi wa vitu.

20 ⁱLakini waovu wataangamia:
Adui za Bwana watakuwa
kama uzuri wa mashamba,
watatoweka,
watatoweka kama moshi.

21 ^jWaovu hukopa na hawalipi,
bali wenye haki hutoa kwa ukarimu.
22 ^kWale wanaobarikiwa na Bwana watairithi nchi,
bali wale anaowalaani watakatiliwa mbali.

23 ^lKama Bwana akipendezwa na njia ya mtu,
yeye huimarisha hatua zake,
24 ^majapojikwaa, hataanguka,
kwa maana Bwana
humtegemeza kwa mkono wake.

25 ⁿNilikuwa kijana na sasa ni mzee,
lakini sijaona kamwe wenye haki wameachwa
au watoto wao wakiombaomba chakula.
26 ^oWakati wote ni wakarimu na hukopesha bila masharti.
Watoto wao watabarikiwa.

27 ^pAcha ubaya na utende wema,
nawe utaishi katika nchi milele.
28 ^qKwa kuwa Bwana huwapenda wenye haki
naye hatawaacha waaminifu wake.

Watalindwa milele,
lakini uzao wa waovu utakatiliwa mbali.
29 ^rWenye haki watairithi nchi,
na kuishi humo milele.

30 ^sKinywa cha mwenye haki hutamka hekima,
nao ulimi wake huzungumza lililo haki.
31 ^tSheria ya Mungu wake imo moyoni mwake;
nyayo zake hazitelezi.

32 ^uWatu waovu huvizia wenye haki,
wakitafuta kuwaua;
33 ^vlakini Bwana hatawaacha mikononi mwao
wala hatawaacha wahukumiwe
kuwa wakosa wanaposhtakiwa.

34 ^wMngojee Bwana,
na uishike njia yake.
Naye atakutukuza uirithi nchi,
waovu watakapokatiliwa mbali,
utaliona hilo.

35 ^xNimemwona mtu mwovu na mkatili akistawi
kama mwerezi wa Lebanoni,
36 ^ylakini alitoweka mara na hakuonekana,
ingawa nilimtafuta, hakupatikana.

37 ^zWatafakari watu wasio na hatia,
wachunguze watu wakamilifu,
kuna mafanikio kwa mtu apendaye amani.
38 ^aaLakini watenda dhambi wote wataangamizwa,
mafanikio yao yatakatiliwa mbali.

39 ^abWokovu wa wenye haki hutoka kwa Bwana,
yeye ni ngome yao wakati wa shida.
40 ^ac Bwana huwasaidia na kuwaokoa,
huwaokoa kutoka kwa waovu na kuwahifadhi,
kwa maana wanamkimbilia.